بالنسبة لملف تسوية الوضعية تجاه الخدمة الوطنية الجزائر 2024 اقدم لكم هذه التجربة التي ستفيدكم حتما
ملف الكفالة للخدمة الوطنية 2024
الحمدلله اليوم جبت الاعفاء بالكفالة عقبال كل واحد ان شاء الله .
تبعوا معايا نفهمكم بالتفصيل .
1-مكانش منها حكاية اذا ماكش مفوت لافيزيت في وقتها ماعندكش الحق فالكفالة .
2- إذا كنت ماكش عاصي وماكش روشارش وداير سورسي قبل مايكون عمرك 25 سنة فعندك الحق يفوتولك لافيزيت نهار لي يشدو عليك ملف الكفالة .
3-تولي روشارش بعد ماتجيك لوردابال مكتوبة بالاحمر وماتروحلهمش .
4-شهادة الكفالة نتاع النوتار غير معترف بها .
5-من حقك انك تستخرج شهادة الكفالة من المجلس الشعبي البلدي (ماكانش منها نتاع مانخرجوهالكش وروح ديرها عند النوتور )
5- الملف الطبي للوالدين جد مهم لأنو هو 80% من قوة الملف .
7-اذا ماكش مسوري تقدر تدير شهادة شهود فالبلدية باللي انت عامل يومي عند الخواص او تشوف صاحب محل يديرلك كاشي تخدم عندو .
8-اذا عندك خاوتك ذكور اكبر منك ومتزوجين ديرلهم شهادة انفصال وهي عبارة عن تصريح شرفي او شهادة شهود تكاشيهم فالبلدية، ولازم تدير وضعية الاخوة تجاه الخدمة الوطنية وزيدلهم شهادات عائلية لخاوتك المتزوجين كدليل بأن خاوتك عندهم عايلات .
9- اذا خاوتك لي فوقك عاصيين او مش مسويين الوضعية رح يعرقلوك وممكن يرفضولك الملف .
10- في كل الاحوال اخدم دوصيك وحاول تدعمو بأكبر كمية من الوثائق وأتكل على ربي وماتسمعش للمعرقلين .
11-اذا قالولك روح ادفع ملف الكفالة في القازيرنة لي جاتك في لوردابال حذاري تدير على كلامهم ،استنى حتى تغلق القازيرنا (عادة مدة فتح الثكنات تكون شهر كامل) يعني استنى تتغلق الدفعة نتاعك ووقتها لوردابال تولي ملغية وبعدها روح لمكتب التجنيد ادفع دوسيك.
12-اذا كنت عاصي رح يبعثوك تشارع وماتتخلعش أدي دوسيك معاك وممكن يعطولك براءة وتسترجع حقك فالإعفاء بالكفالة .
13-كل شيء بتسهيل الله عز وجل واذا فوتتها راك راجل الحمدلله
Related Posts
بعد دخول سنة 2024 ثم طرح الجريدة الرسمية الجزائرية 2024...